Гісторыя

У лістападзе 1939 года на тэрыторыі вёскі Нача быў створаны саўгас імя Кірава, які праіснаваў да нямецкай акупацыі. Як паведамілі старажылы Зялёнка Марыя Паўлаўна, Зялёнка Ганна Іванаўна і Масель Лідзія Дзянісаўна, ў першыя дні свайго існавання саўгас налічваў 50 кароў, 30 коней, мелася невялікая птушкаферма, сельскагаспадарчая тэхніка: малатарні, жняяркі, касаркі. Першым дырэктарам саўгаса імя Кірава стаў Сушчэня Іван Паўлавіч.

У 1940 годзе атрымалі першыя трактары, за штурвал якіх селі трактарысты: Смаршчок Рыгор Сцяпанавіч, Дудук Васіль Фёдаравіч, Мурочак Пётр Іванавіч.

У 1941 годзе саўгас імя Кірава быў пераіменаваны ў саўгас “Нача”.

Пасля вайны гаспадарка была адноўлена і ўжо ў 1947 годзе саўгас “Нача” працягваў сваю дзейнасць.

У 1951 годзе дырэктарам саўгаса “Нача” стаў таварыш Стабрэдаў Міхаіл Сямёнавіч.

У красавіку 1957 года адбылося аб’яднанне саўгаса “Нача” і калгаса “Новы шлях”.

Гісторыя калгаса “Новы шлях” налічвае ўсяго некалькі гадоў. Узнік гэты калгас 21 лютага 1952 года. У памяшканні Шчаснавіцкай пачатковай школы адбыўся мнагалюдны сход калгаснікаў Перахрэсцкага сельсавета. Члены чатырох сельгасарцелей сельсавета вынеслі адзінае рашэнне – аб’яднацца ў адзін узбуйнены калгас “Новы шлях”. Агульны сход выбраў новае праўленне калгаса з 9 чалавек і рэвізійную камісію. Старшынёй калгаса абраны Іван Адамавіч Попка. Калгас “Новы шлях” аб’яднаў чатыры вёскі: у вёсцы Грушаўка ў 1947 годзе дзейнічае дзяржаўная племянная канюшня “Грушаўка”, у вёсцы Перахрэсце ў снежні 1948 года ўтвораны калгас “30 год БССР”, у вёсцы Пашкоўцы ў 1949 годзе ўтвораны калгас імя Жданава, у вёсцы Шчаснавічы ў снежні 1948 года – калгас “Новы шлях”.

У сакавіку 1959 года калгас імя Хрушчова (вёскі Мыслабаж, Жарскія, Русінавічы, Гаслаўшчына) быў аб’яднаны з саўгасам “Нача” пад старшынствам Ліпаўкі Аляксандра Якаўлевіча. У 1965 годзе ў адпаведнасці з загадам Міністэрства сельскай гаспадаркі БССР гаспадарка была падзелена на племянны саўгас “Нача” і саўгас “Ляхавіцкі”. Саўгас “Нача” ўвайшоў у склад Рэспубліканскага трэсту племянных саўгасаў.

3 лютага 1973 года племянны саўгас “Нача” быў перайменаваны ў племянны завод “Нача”. Са студзеня 2001 года па 2010 год – рэспубліканскае сельскагаспадарчае унітарнае прадпрыемства “Нача”.

З 2010 года – дзяржаўнае прадпрыемства “Нача”.

Кіраўнікі гаспадаркі:

1939–1941 гг. – Сушчэня Іван Паўлавіч.

1944–1952 гг. – Фаменка Яўхім Іванавіч.

1951–1956 гг. – Стабрэдаў Міхаіл Сямёнавіч.

1956–1965 гг. – Ліпаўка Аляксандр Якаўлевіч.

1965–1969 гг. – Віткоўскі Аркадзь Калінкавіч.

1969–1999 гг. – Варановіч Міхаіл Лявонцьевіч. Старшыня Савета ветэранаў Начаўскага сельскага Савета. Узнагароджаны Ганаровай граматай Вярхоўнага Савета БССР, ордэнам Чырвонай Зоркі, ордэнам “Ветэран працы”, медалём “100 год з дня нараджэння У.І.Леніна”.

За гэты час гаспадарка атрымала статус племзавода, была шматгаліновай, але галоўным было развядзенне беларускай буйна-белай пароды свіней. Сваю задачу – забеспячэнне племянным маладняком гаспадарак Брэсцкай вобласці – племзавод выканаў паспяхова. Доказам гэтага служыць два Дыпломы Пашаны і Дыплом 1 ступені ВДНГ, удзельнікам якіх быў племзавод доўгія гады. Міхаіл Лявонцьевіч як кіраўнік у сваёй працы лічыў галоўным даваць правільную і справядлівую ацэнку работы людзей.

За апошнія гады змяніліся яшчэ пяць кіраўнікоў. Гэта Тарлюк Мікалай Сямёнавіч, Піліпчык Мікалай Мікалаевіч, Віхноўскі Ігар Якаўлевіч, Рамейка Галіна Мікалаеўна, Бакуновіч Уладзімір Аляксандравіч.

Сёння кіруе гаспадаркай Тарлюк Мікалай Сямёнавіч. У 1986 годзе прыехаў па размеркаванню на работу ў калгас “Беларусь” Ляхавіцкага раёна па спецыяльнасці галоўны інжынер. З 2000 па 2002 гады ўзначальваў РСУП “Нача”, у 2003 годзе – старшыня Начаўскага сельскага савета, у маі 2010 года назначаны дырэктарам ДП “Нача”.

У склад гаспадаркі ўваходзяць тры жывёлагадоўчыя фермы. З іх две малочнатаварныя (ферма “Цэнтр”, ферма “Зубелевічы”) і ферма для вырошчвання маладняку КРС. Працуе машына-трактарны парк, які налічваў на 01.01.2021 г. 13 грузавых, 29 трактароў, 4 спецмашыны.

Па стану на 01.01.2021 г.:

Агульная зямельная плошча складае 2759 га.

Сельскагаспадарчыя угоддзі – 2424 га.

Пашы і сенажаці – 554 га, сад – 160 га.

Кароў – 3400.

Сярэднегадавы надой малака ад адной каровы: 2020 год – 6672 кг.

Асноўны напрамак дзейнасці гаспадаркі – развіццё буйной рагатай жывёлы.

WYSIWYG Web Builder

Кіраўнікі:

Тарлюк Мікалай Сямёнавіч нарадзіўся 15 сакавіка 1963 года ў вёсцы Набярэжная Ляхавіцкага раёна Брэсцкай вобласці. Скончыў Беларускі інстытут механізацыі сельскай гаспадаркі, інстытут павышэння кваліфікацыі і перападрыхтоўкі кадраў установы адукацыі “Брэсцкі дзяржаўны тэхнічны ўніверсітэт”.
Працоўную дзейнасць пачаў у 1979 годзе слесарам племзавода “Ганчароўскі” Ляхавіцкага раёна. Працаваў інжынерам-наладчыкам, інжынерам, старшым інжынерам-наладчыкам, галоўным інжынерам калгаса “Беларусь” Ляхавіцкага раёна.
З 1997 па 2003 год – дырэктар племяннога завода “Нача”.
З 2003 па 2010 год – старшыня Начаўскага сельскага выканаўчага камітэта.
З 2010 года ўзначальвае камунальнае ўнітарнае сельскагаспадарчае прадпрыемства па племянной справе “Нача”.
З’яўляецца дэпутатам Ляхавіцкага раённага Савета дэпутатаў, Начаўскага сельскага Савета дэпутатаў.
Узнагароджаны Ганаровай граматай Міністэрства сельскай гаспадаркі і харчавання Рэспублікі Беларусь “За шматгадовую добрасумленную працу ў сельскай гаспадарцы і ў сувязі з 60-годдзем утварэння племзавода “Нача”, Ганаровай граматай Ляхавіцкага раённага Савета дэпутатаў і іншымі граматамі.

Фотагалерэя

Крыніца пошука:

  • Ананенка, С. Павышаем прадуктыўнасць статка / Ананенка С. // Будаўнік камунізму. — 1978. — 8 чэрвеня.
  • Барадзіна, В. Кропка апоры — працавітасць людзей / Вольга Барадзіна ; фота У. Гурыновіча // Ляхавіцкі веснік. — 1999. — 27 лістапада ( 93). — С. 2 : фат.
  • Гарады і вёскі Беларусі : Энцыклапедыя. Т. 4, кн. 2. Брэсцкая вобласць / рэдкал. : Г.П.Пашкоў (гал. рэд.) [і інш.]. – Мінск : БелЭН, 2007. – 608 с. : іл .
  • Казакевіч, М. Крыніцы высокіх надояў / Казакевіч М. // Будаўнік камунізму. — 1970. — 11 красавіка. — Даярка с-са "Нача" аб вопыте сваей работы.
  • Лапіч, А. "Бельгійскі" луг у начаўскіх угоддзях / Аліна Лапіч // Ляхавіцкі веснік. — 2014. — 18 кастрычніка 78. — С. 8. — Кожную пяцідзёнку на рахунак ДП "Нача" паступае па 150 мільёнаў рублёў за малако.
  • Памяць: Гіст.-дакумент. Хроніка Ляхавіц. р-на /Беларус. Сав. Энцыкл.; Рэдкал.: І. П. Шамякін (гал. рэд.) і інш.; Рэд.-скл. В. У. Скалабан; Маст. А. М. Хількевіч.– Мн.: БелСЭ, 1989.– 439 с., [8] л. іл.: іл.
  • Права на святочны піт-стоп // Ляхавіцкі веснік. — 2021. — 20 лістапада ( 88). — С. 3 : фат. — ААТ "Нача" з'яўляецца рэдкім у раёне сельскагаспадарчым прадпрыемствам, дзе за перыяд 2021 года не было дапушчана змяншэння статка буйнай рагатай жывёлы.
Паважаныя карыстальнікі!
Калі вы заўважылі памылкі або недакладнасці,
а таксама валодаеце дадатковай інфармацыяй,
просьба паведаміць нам па тэлефоне 8 (01633)  6-09-57
або напісаць на электронную пошту liblh@brest.by

© ДУК "Ляхавіцкая раённая цэнтралізаваная бібліятэчная сістэма", 2022