Першы калгас на тэрыторыі вёскі Русінавічы быў створаны ў 1949 годзе. Аб гэтым сведчыць даведка з газеты “Савецкі патрыёт” (цяпер “Ляхавіцкі веснік”) за верасень 1949 года, дзе напісана, што 27 верасня ўтварыліся калгасы ў вёсках Дарава, Марынава, Шчэрбава, Каўпакі, Русінавічы. Калгас называўся “Маладая гвардыя”. Дзейнічаў калгас да 1952 года пад кіраўніцтвам Крысюка Міхаіла. Старшыні калгасаў вельмі часта мяняліся. Пасля Крысюка Міхаіла гэту пасаду займалі Калбаса Вікенцій, Лёгкі Іван.
У 1949 годзе ў вёсцы Мыслабаж створаны калгас “Бальшавік”. У калгас уступіла 42 сялянскія гаспадаркі. Старшынёй калгаса абраны Расоха Піліп.
У 1950 годзе ў вёсцы Жарскія створаны калгас імя Купалы, у вёсцы Гаслаўшчына – калгас імя Хрушчова.
19 красавіка 1953 года чатыры сельгасарцелі – “Бальшавік”, “Маладая гвардыя”, імя Хрушчова і імя Купалы – аб’ядналіся ў адзін буйны калгас. Калгаснікі адзінадушна далі яму назву імя Хрушчова. На арганізацыйным сходзе абраны новы састаў праўлення калгаса і рэвізійнай камісіі. Старшынёй калгаса стаў Пляшко Іван Васільевіч.
У сакавіку 1959 года калгас імя Хрушчова быў аб’яднаны з саўгасам “Нача” пад старшынствам Ліпаўкі Аляксандра Якаўлевіча.
У 1965 годзе прайшло раздзяленне гаспадаркі на саўгас “Нача” і племсаўгас “Ляхавіцкі”. Да вёсак Мыслабаж, Русінавічы, Гаслаўшчына, Жарскія дабавілася вёска Рачканы. Кіравалі саўгасам Зялёнка К.К., Сакун В.Н., Дзехцяр А.А.
З кастрычніка 1997 года дырэктарам племсаўгаса “Ляхавіцкі” абраны Вітко Александр Іванавіч. За час яго працы ў гаспадарцы зарэкамендаваў сябе кваліфікаваным спецыялістам, высокім прафесіяналам і добрым кіраўніком. Пры яго умелым гаспадарчым падыходзе племсаўгас “Ляхавіцкі” быў адзін з лепшых у сельскагаспадарчай вытворчасці Ляхавіцкага раёна.
14 сакавіка 1991 года племсаўгас “Ляхавіцкі “ перайменаваўся ў калгас “Ляхавіцкі”.
З 31 ліпеня 2003 года – СВК “Ляхавіцкі”.
17 лютага 2017 года Вітко Александра Іванавіча на пасадзе старшыні СВК “Ляхавіцкі” змяніў яго сын, Іван Аляксандравіч Вітко.
